زوجى الغالى اتقى ربنا فيا

انتوا اكيد مستغربين العنوان بس مش تستغربوا انا هحكلكم قصه العنوان ده
كتير اوى مننا بيشتكى من الزوج
اللى جوزها مش بيسال عنها
اللى جوزها بخيل معاها واللى اقصده هنا هو بخيل فى مشاعره
اللى مش مهتم بيها
اللى صوته عالى
المشاكل الزوجيه عموما حتى لو كانت تافهه
ومن موضوعى الاول فيه كتير عرفوا ان جنينى مات ولحد دلوقتى لسه مفيش نصيب فى الحمل
البريود الشهر ده اتاخرت عليا 4ايام حسيت بامل رهيب وقولت يامسهل بس للاسف روحت حللت دم ومفيش حمل وعرفت ان البريود رجعت اتاخرت عليا تانى
مش هكدب عليكم زعلت مااحنا بشر برده بس مش بينت ده قدام جوزى بس هو حس بيا
ماهى مش عادتك يالميس فين الدوشه اللى بتعمليها ومناقرتك ليا
وفات يومين بس اتحسنت كتير وقلت الحمدلله راضيه يارب
المهم جه امبارح لقيته جايبلى شيكولاته كبيره اخدتها وفرحت اوى
ولما نام فضلت جمبه وفضلت ادعى ربنا يهدى سرنا ويحمينا ويسترها معاه ويرزقه لانه حاول يدخل السرور بقلبى حتى لو بحاجه بسيطه
فيه حديث قدسى للاسف مش فكراه بس هجيبه ليكم باذن الله فيما معناه
ان اللى بيدخل على قلب مؤمن اى نوع من انواع السرور لما الانسان ده بيموت قبره بينور ويقوله انت مين يقوله انا السرور اللى ادخلته على قلب فلان فى يوم من الايام
اه جوزى ادخلى السرور حتى لو بشيكولاته
وهو نايم قولته باذن الله ربنا يقدرنى واتقى ربنا فيه واسعدك على اد مااقدر طبعا انا كنت بكلم نفسى
وقولت امتى الوحده تزهق من مشاكل جوزها وتقوله اتقى ربنا فيا
اقول امتى الكلمه دى
مش ده موضوعى اومال ايه موضوعك يالميس انتى رغيتى كتير اوى
هقولك انك علشان تقولى الكلمه دى لازم تكونى مش مقصره اصلا فى حاجه علشان لما تتكلمى يبقى عندك حق
1-تقولى الكلمه دى لما ترضى ربنا وتعملى كل اللى عليكى وتملى بيتك بالاذكار على فكرة انا جه فى بالى انك ممكن تكتبى الاذكار بشكل لذيذ وتلزقيهم على ابواب الغرف
\خلى بيتك كله ينطق بذكر الله
بخرى شقتك دايما واقرى قراءن وانتى بتبخرى
2-تقولى الكلمه دى لو فيكى وجع كبير واستحملتيه انا سمعت خطبه للشيخ هانى حلمى بعنوان وبشر الصابرين لان فيه سيده ربنا ابتلاها بالكانسر وفضلت مخبيه على كل اللى حواليها وعمرها ماقصرت مع جوزها رغم انه الوحيد اللى كان عارف بس مقصرتش معاه ولافى حق بيتها ولا حق اى حد وكانت نشيطه جدا وعمرها ماقصرت مع ربنا ويوم وفاتها اقسمت المغسله ان كان وشها فى ابتسامه ونور رهيب
لانها صبرت
تفتكروا بقى احنا عندنا صبر على الصداع حتى؟عندنا صبر على الزوج لما يدخل قرفان وزهقان واحنا نقرفه اكتر بمشاكل
3-تقولى كلمه اتقى ربنا فيا لما يجى يلاقيكى فى احسن صوره ليكى وعامله بيتك جنه
اه اخلقى جنه فى بيتك اساها القرءان والنضافه والهدوء
4- تقولي الكلمه دى لما تديله كل حياتك وتحصنيه وتديله عمرك كله ومش تشتكى
اقسملكم بالله ان الزوج مهما كان قيه قوة ولاجبروت هو طفل كبير
ليا وحده صحبتى زارتنى امبارح جوزها ده بالبلدى كده مطفحها الدم وقالتلى اخيرا عرفت الكود بتاعه اللى يخلينى سعيده معاه
هو انى اعامله زى الطفل واضحك عليه مع انها مش بطيقه
الراجل الجبروت ده اتحول لانسان تانى خالص بقى يفسحها ويخرج ولادها ويجبلها هدايا
ده لانها عرفت تتعامل ازاى واكيد كل زوج ليه برده مفتاحه
هتقولولى يالميس واحنا يعنى معندناش دم ماهما لازم يحسوا بينا يعنى احنا نعمل كل ده وهما يعملوا ايه بقى
هقولكم
كان فيه ست اتبهدلت فى حياتها شافت الامرين من جوزها اللى اتجوز عليها
بس هى صبرت ورضيت واتحملت
وهو كان بيحاول يستفزها باى طريقه حتى الاكل اللى هى كانت بتجيبه بفلوسها
ولما بناتها يقولولها ده هو الراجل هو اللى يجيب ويصرف
كانت تقولهم كانى بطلع اكله زكاه
وكانت راااااااااااااااااضيه
عمرها ماعملت مخلوق وحش
ويوم وفاتها من كتر الناس محدش كان عارف يقعد
على فكرة الست دى تبقى امى الله يرحمها
(بالله عليكم اصبروا وعدوا وسامحوا اقسم بالله مفيش حاجه فى الدنيا تستاهل اصلا الزعل
انتوا اتحطيتوا فى حياه استحملوها شوفى جوزها حاولى تدورى على مفتاحه
اوعى تياسى من حاجه
غيرى نفسك قبل ماتغيريه(لايغير الله مابقوم حتى يغيروا مابانفسهم)شوفى نفسك الاول
واوعى تقولى انا مش مقصره
جوزك عمره ماهيقسى عليكى او يعمل فيكى بلاوى الا لو فيه حاجه
راجعوا نفسكم
قبل ماتقفوا ادام ازواجكم
وتقولوا
(اتقى ربنا فيا)
اسفه على الاطاله
بحبكم فى الله وادعولى بالذريه الصالحه

زوجى الغالى اتقى ربنا فيا 3937927111

ربنا يهديكم لبعض ويسر ليكم الامور ويوفقكم